கடந்த மே 30-ஆம் தேதி நடுவண் அமைச்சர்கள் பதவி ஏற்றுக் கொண்டார்கள். அப்போது மிகவும் எளிமையான தோற்றத்தில் ஒருவர் மேடை ஏறினார். அந்த மெலிந்த சந்திர சாரங்கியைப் பார்த்ததும் அரங்கத்தில் பலத்த கைத்தட்டல்.
அந்தக் கைதட்டலுக்குப் பின்னால் என்ன மாதிரியான உணர்வுகள் இருந்தன. இருந்து இருக்கும். எளிமையானவர் என்பதற்காகவா அல்லது இந்துத்வா எனும் பெயரில் தீவிரவாதத்தைக் கட்டவிழ்த்து விட்டவர் என்பதற்காகவா? யாருக்கும் தெரியப் போவது இல்லை.
இவருடைய வாழ்க்கையின் மறுபக்கத்தில் கதை வேறு மாதிரியாகப் பயணிக்கின்றது.
சந்திர சாரங்கிக்கு 64 வயதாகிறது. ஒடிசா மாநிலப் பா.ஜ.க.வில் ஒரே ஒரு மக்களவை உறுப்பினர். ஒடிசா மாநிலத்திற்கு வெளியே இவரை யாருக்கும் அப்படி ஒன்றும் பெரிதாகத் தெரிந்து இருக்க வாய்ப்பு இல்லை.
அதே சமயத்தில் 1999-ஆம் ஆண்டு ஓர் ஆஸ்திரேலியப் பாதிரியாரையும் அவருடைய பிள்ளைகளையும் கொன்றதாக அவர் மீது வழக்கு தொடரப்பட்ட செய்திகளும் பரவலாகி வருகின்றன.
அவர் சட்டமன்ற உறுப்பினராக இருந்த போது புவனேஷ்வரில் இருக்கும் சட்டமன்றத்திற்குப் பெரும்பாலும் நடந்தே செல்வார். சமயங்களில் சைக்கிளிலும் செல்வார்.
எளிமையின் மறுபக்கத்தில் ஒரு கொடூரம் இருப்பதைத் தெரிந்து கொண்டதும் நம்முடைய எழுதுகோலிலும் நேர்மை தேவைப் படுகின்றது.
(மலாக்கா முத்துக்கிருஷ்ணன்)
