1995-ஆம் ஆண்டு அவரின் வரலாற்றுப் புதினமான 'வானம் வசப்படும்' என்ற நூலுக்கு சாகித்ய அகாடமி விருது வழங்கப் பட்டது. இந்தப் புதினம் ஆனந்தரங்கம் பிள்ளையின் காலத்தைக் களமாகக் கொண்டு எழுதப் பட்டது.
புதுச்சேரியில் பள்ளிப் படிப்பை முடித்துவிட்டு கரந்தை கல்லூரியில் தமிழ் வித்வான் பட்டம் பெற்றவர். தன் வாழ்க்கையைத் தஞ்சாவூரில் ஓர் ஆசிரியராகத் தொடங்கியவர்.
குமுதம், ஆனந்த விகடன், குங்குமம் ஆகிய வாரப் பத்திரிக்கைகளில் பணிபுரிந்தவர்.
இவரின் படைப்புகள் இந்தி, தெலுங்கு, கன்னடம், ஜெர்மன், பிரெஞ்சு, ஆங்கிலம், சுவிஷ் மொழிகளில் மொழிபெயர்க்கப் பட்டுள்ளன. இவரின் நாடகமான முட்டை டெல்லி பல்கலைக்கழகப் பாடத் திட்டத்தில் உள்ளது.
அவர் சொல்கிறார். சென்னையில் நான் தங்கி இருக்காத வீதிகளே இல்லை. அதன் எல்லா பேட்டைகளும் எனக்குத் தெரியும். அத்தனை பேட்டைகளும் என்னை அறியும்; நான் அதில் வாழ்ந்த மனிதர்களை அறிவேன்.
பிரபஞ்சனின் எழுத்து வாழ்க்கையின் 55-வது ஆண்டு விழா சென்னை ரஷ்யன் கலாசார மையத்தில் ஓர் இலக்கியத் திருவிழாவாக நடந்தேறியது.
“பிரபஞ்சன் பணத்தைச் செலவழிக்கிற வேகம் எனக்குத் தெரியும். அந்த வேகத்துக்கு இந்த பத்து இலட்சம் ரூபாய் எம்மாத்திரம். ஒரு மாதமோ... ரெண்டு மாதமோ. எனினும் இந்தப் பணத்தை அவர் தாராளமாகச் செலவு செய்யலாம். இன்னும் அவருக்குப் பணம் திரட்டித்தர நாங்கள் இருக்கிறோம்” என்கிறார் எழுத்தாளர் பவா செல்லதுரை.
எழுத்தாளர் எஸ்.ராமகிருஷ்ணன் சொல்கிறார். “பிரபஞ்சன் சென்னைக்கு வந்தததற்குக் காரணம்... இலக்கியத் தாகம் என்று நினைப்போம். அதுவும் ஒரு காரணம்தான். ஆனால் அதைவிட ஒரு முக்கியக் காரணம் அவர் சினிமாவில் கதாநாயகனாக நடிக்கத்தான் சென்னைக்கு வந்தார்.
பிரபஞ்சனின் ‘ஆண்கள் பெண்கள்’ நாவலில் ஒரு பெண் தேவாலயத்தில் இயேசுவிடம் வேண்டுவாள்... ‘கடவுளே... நான் குளிக்க மறைவாக ஒரு இடம் வேண்டும்’ என்று. அந்த வரி அவரோடு எப்போதும் பயணித்துக் கொண்டே இருந்தது.
*விருதுகள்*
சாகித்திய அகாதமி விருது - வானம் வசப்படும் (1995)
பாரதிய பாஷா பரிஷத் விருது
கோயம்புத்தூர் கஸ்தூரி ரங்கம்மாள் விருது - மகாநதி
இலக்கியச் சிந்தனை விருது - மானுடம் வெல்லும்
சி. பா. ஆதித்தனார் விருது - சந்தியா
நேற்று மனிதர்கள் - தமிழக அரசின் பரிசு
ஒரு ஊரில் ரெண்டு மனிதர்கள் - தமிழக சிறந்த சிறுகதைத் தொகுப்பிற்கான பரிசு
கடந்த சில மாதங்களாக புற்றுநோயால் அவதிப்பட்டு வந்தார். சில நாள்களுக்கு முன்பு உடல் நிலை கடுமையாக பாதிப்பு அடைந்தது. புதுச்சேரியில் உள்ள தனியார் மருத்துவமனையில் அனுமதிக்கப் பட்டார்.
இந்த நிலையில் நேற்று (21.12.2018) காலை 11:30 மணிக்கு காலமானார். பிரபஞ்சனின் மறைவுக்குப் பலரும் சமூக ஊடகங்களில் இரங்கல் தெரிவித்து வருகின்றனர். உலகத் தமிழர் இனம் ஒரு தமிழ்ச் சகாப்தத்தை இழந்து விட்டது.
கருத்துகள் இல்லை:
கருத்துரையிடுக