தாமரை மலர் இந்துக்களின் தேவதை சரஸ்வதியின் சிம்மாசனம். இந்திய சமயத் தத்துவத்தின் தலைவாசல். சேற்றில் மலர்ந்தாலும் செந்தாமரை என்றும் செந்தாரகை தான். ஆன்மீகத்தின் தலை மலர் அல்லவா. அதுவே தனிப் புகழ்மாலை அல்லவா.
 
தாமரைக் கோபுரம் (Lotus Tower), தாமரை மலருக்குச் சிறப்பு செய்யும் கோபுரம். இந்தியப் பாரம்பரிய மலருக்குச் சிறப்பு சேர்க்கும் கோபுரம். இலங்கையில் உள்ளது.

உலகிலேயே உயரமான கோபுரங்களில் இதுவும் ஒன்று. இரு வாரங்களுக்கு முன்னதாக, 2019 செப்டம்பர் 16-ஆம் தேதி அதிபர் மைத்திரிபால சிறிசேனவினால் திறந்து வைக்கப் பட்டது.

தமிழர்கள் சிலருக்கு அவரைப் பிடிக்காமல் இருக்கலாம். இருப்பினும் கலை நயத்துடன் தாமரைக் கோபுரத்தைப் பார்ப்போம். போற்றுவோம். கலையை ரசிப்போம். அதுவே தமிழர்களின் பண்பாடு. ஒருவருடைய நற்சேவைகளைப் பாராட்டும் பழக்கம் நமக்கு வேண்டும். அதுவே நல்ல ஒரு மனிதப் பாண்பு.
 
தாமரைக் கோபுர நிர்மாணிப்புப் பணிகள் 2012-ஆம் ஆண்டு ஜனவரி மாதம் 20-ஆம் தேதி தொடங்கியது. கட்டி முடிக்க 7 ஆண்டுகள்.

மொத்தம் 104.5 மில்லியன் அமெரிக்க டாலர் செலவு. சீனாவின் எக்சிம் வங்கி 67 மில்லியன் கடனாகக் கொடுத்து உதவியது.

தாமரைக் கோபுரத்தில்...

- 1500 வாகனங்கள் நிறுத்தக் கூடிய வசதி

- 50 வானொலி நிலையங்கள்

- 50 தொலைக்காட்சி நிலையங்கள்

- 20 தொலைத்தொடர்பு நிலையங்கள்

- கொழும்பு நகரத்திற்குள் செல்லும் ஒவ்வொருவரின் கண்களுக்கும் எட்டிய தூரத்தில் இருந்து தெரியக் கூடிய கோபுரம். 


- கோபுரத்தின் முழுமையான உயரம் 356.3 மீட்டர்.

- கட்டடத்தின் 215 மீட்டர் வரை லிப்ட் வசதி.  90 மாடிகள் உச்சிக்குச் செல்ல 2 நிமிடங்கள். அதி வேகமான லிப்டுகள்.

- உலகிலேயே 19-ஆவது உயரமான கோபுரம். ஆசியாவில் 11-வது உயரமான கோபுரம்.

- கோபுரத்தின் மேல் பகுதியில் 400 பேர் அமரும் வசதி கொண்ட மாநாட்டு மண்டபம்; திருமண வரவேற்பு மண்டபம்; ஆடம்பரமான தங்கும் அறைகள்.


-  6-ஆவது மாடியில் சுழலும் உணவகம். கொழும்பு நகர் முழுவதையும் உட்கார்ந்த இடத்தில் இருந்தே பார்க்கலாம்.

- 8 மின்தூக்கிகளை (லிப்ட்) கொண்டது. நொடிக்கு 7 மீட்டர் உயரும் வேகம். படு வேகம்.

- கோபுரத்தின் அடித்தளத்தில் மண்ணுக்கு அடியில் நான்கு மாடிகள்.

கூடுதல் தகவல். மலேசியாவின் கோலாலம்பூர் கோபுரம் (Kuala Lumpur Tower) 421 மீட்டர் உயரம் (1,381 அடி). தாமரைக் கோபுரத்தை விட 44 மீட்டர்கள் கூடுதலான உயரம். 


உலகில் 7-ஆவது உயரமான கோபுரம். 54 விநாடிகளில் உச்சியைச் சென்று அடையும் மிக வேகமான மின்தூக்கிகள்.

1995 மார்ச் மாதம் முதலாம் தேதி கட்டி முடிக்கப் பட்டது. மலேசியாவின் NTV7 இங்கு இருந்து தான் ஒலிபரப்பு செய்யப் படுகிறது.

(மலாக்கா முத்துக்கிருஷ்ணன்)
02.10.2109


பேஸ்புக் அன்பர்களின் பின்னூட்டங்கள்

சாகுவாரோ (Saguaro) மலர். கற்றாழை இனத்தைச் சேர்ந்த மலர். அமெரிக்கா அரிசோனா பாலவனத்தில் காணப்படும் அரிதிலும் அரிதான மலர். தற்சமயம் அரிசோனா மாநிலத்தின் மாநில மலராகப் பிரகடனம் செய்து இருக்கிறார்கள்.


இது பாதுகாக்கப்பட்ட அமெரிக்கத் தேசியத் தாவரம். அறிவியல் பெயர் Carnegiea gigantea. 60 அடி உயரம் வரை வளரும். 300 ஆண்டுகள் வரை உயிர் வாழக் கூடியது.

இந்தக் கற்றாழையைக் கேமரன் மலையில் முதலில் பயிர் செய்து பார்த்தார்கள். அமெரிக்கா அரிசோனாவில் இருந்து மலேசியாவிற்குக் கொண்டு வரவே மிகவும் சிரமப் பட்டுப் போனார்கள். 1970-களில் நடந்த நிகழ்ச்சி.

அரிசோனா அரசாங்கமும் மலேசிய அரசாங்கமும் வெள்ளைப் பேபரில் கையெழுத்துப் போட்ட பிறகு தான் கொண்டு வரப்பட்டது. 


முதலில் ரிங்லெட் பகுதியில் வளர்த்துப் பார்த்தார்கள். ஆரம்பத்தில் ஓகே. போகப் போக இந்தச் சாகுவாரோ கற்றாழை, மாவீரர் செகுவாரா மாதிரி அடம் பிடிக்கத் தொடங்கி விட்டது.

கடந்த ஐம்பது ஆண்டுகளில் ஐந்தே ஐந்து அடி வளர்ந்து இருப்பதாகச் சொல்கிறார்கள். நான் சொல்வது அதாவது அசல் சாகுவாரோ கற்றாழை. அமெரிக்காவில் இருந்து கொண்டு வரப்பட்ட கற்றாழை.

மற்றபடி கேமரன் மலையில், டூப்ளிகேட் சாகுவாரோ கற்றாழைகள் நிறையவே உள்ளன. தடுக்கி விழும் இடங்களில் எல்லாம் கற்றாழைகள் வழுக்கி வழுக்கி விழுகின்றன.


அமெரிக்காவில் இந்தக் கற்றாழையை வெட்டி எடுப்பதும் குற்றம். தோண்டி எடுப்பதும் குற்றம். இருந்தாலும் அவ்வளவு சுலபத்தில் தோண்டி எடுத்துவிட முடியாது. இதன் எடை சமயங்களில் 500 கிலோ கிராம் வரை தாண்டிப் போகும். அதாவது அரை டன். எப்படி உங்கள் வசதி.

அப்படித் தான் 1982-ஆம் ஆண்டு. டேவிட் குருண்ட்மேன் என்பவர் ஒரு பாலைவனத்தில் இந்த மாதிரி ஒரு கற்றாழையைத் தோண்டி இருக்கிறார். அது ஒரு பெரிய கற்றாழை. சும்மா இருந்த சங்கை ஊதிக் கெடுத்தது மாதிரி தான்.

அதன் அடிப்பாகத்தைத் தோண்டிக் கொண்டு இருக்கும் போது, அதன் கிளைப் பாகம் ’படார்’ என்று உடைந்து ’டபார்’ என்று அவர் மேலேயே விழுந்து இருக்கிறது. கற்றாழைக்கு அவர் மீது சரியான கோபம் வந்து இருக்கலாம். சொல்ல முடியாது. ஆள் அபேஸ்.
அதன் எடை 230 கிலோ. அவரையும் நசுக்கி அவரின் காரையும் நசுக்கிப் போட்டு விட்டது. மரத்தின் கிளை விழுந்தே மனுசன் செத்துப் போகிறான் என்றால் மரம் விழுந்து இருந்தால் என்ன ஆகி இருக்கும். வெங்காயச் சட்ணி.

தொட்டால் சிணுங்கி என்று சொல்வார்களே அந்த மாதிரி செல்லமாக வளரும் கற்றாழை. மெதுவாகத் தான் வளரும். வெப்பம் குறைந்தாலும் இறந்து விடும். கூடினாலும் இறந்து விடும்.

கடல் மட்டத்தில் இருந்து 4000 அடி உயரத்தில் நன்றாக வளரும். சரியான தட்ப வெப்ப நிலை தேவை. அது வளரும் காலத்தில் முதல் 75 ஆண்டுகள் வரை அதற்கு கிளைகள் முளைக்காது.

மலேசியாவில் இணையம் மூலமாக (லசாடா) 258 ரிங்கிட்டிற்கு ஆர்டர் செய்து  வாங்கலாம். ஆனால் அது அசலானதா என்று உறுதியாகச் சொல்ல முடியாது. ஏன் என்றால் அசல் கற்றாழைக்கு அமெரிக்காவில் தடை செய்து இருக்கிறார்கள்.

இந்தக் கற்றாழையை மரபணு மாற்றங்கள் மூலமாகச் சின்னதாக வடிவம் செய்து விட்டார்கள். தைவான் நாட்டில் முதலில் செய்து இருக்கிறார்கள். அதையே சீனா கடத்திக் கொண்டு போய் பெரிய அளவில் காசு பார்த்துக் கொண்டு இருக்கிறது.


மரபணு மாற்றங்கள் செய்யப்பட்ட கற்றாழைகளை, கேமான் மலையில் தானா ராத்தா, பிரிஞ்சாங் பகுதியில் விற்கிறார்கள். அங்கே என்ன... மலேசியா பூராவும் விற்கிறார்கள்.  விலை 20 ரிங்கிட்.

எல்லாமே மரபணு மாற்றங்கள் செய்யப் பட்டவை. ஓரிஜினல் உங்களுக்குக் கிடைக்கவே கிடைக்காது. 


மரபணு மாற்றங்கள் என்று சொல்லும் போது ‘எதைத் தான் விட்டு வைத்தார்கள்’ எனும் பொன் மொழி வருகிறது. பணம் என்று வந்தால் மனுசனையே மடித்துச் சுருட்டி... சுருட்டு மாதிரி Buy one Free One என்று விற்று விடுவார்கள்.

நல்ல வேளை. அமெரிக்கா கற்றாழைகள் செய்த புண்ணியம். அரசியல்வாதிகள் கண்களில் படவில்லை. மலேசிய அரசியல்வாதிகளைச் சொல்லவில்லை. ரொம்ப ரொம்ப நல்லவர்கலைப் பற்றி விமர்சனம் செய்வது பாவம் இல்லையா?

சான்றுகள்:

1. The IUCN Red List of Threatened Species". IUCN Red List of Threatened Species.

2. (https://en.wikipedia.org/wiki/Saguaro)

3. Life Cycle of the Saguaro" (PDF). Arizona-Sonora Desert Museum.

(மலாக்கா முத்துக்கிருஷ்ணன்)
30.09.2019
பேஸ்புக் அன்பர்களின் பின்னூட்டங்கள்

தாய்லாந்தில் அண்மையில் ஒரு நெடுஞ்சாலை கட்டினார்கள். அதன் பெயர் பிரச்சின்புரி (Prachin Buri) நெடுஞ்சாலை. இந்த நெடுஞ்சாலை இரு வனப் பூங்காக்களைக் குறுக்காக வெட்டிச் செல்கிறது. அந்த இரு வனப் பூங்காக்கள்:

1. தாப் லான் வனப் பூங்கா (Thap Lan National Park).

2. காவோ யாய் வனப் பூங்கா (Khao Yai National Park).
 
அதனால் வனவிலங்குகள் வாகன விபத்துகளுக்கு உள்ளாகின்றன. நிறையவே விபத்துகள். இந்த விபத்துகளைத் தவிர்ப்பதற்காக வனவிலங்குகள் கடக்கும் பாதையை உருவாக்கி இருக்கிறார்கள்.

அந்த வகையில் இரு வனப் பூங்காக்களும் ஒன்றாய் இணைக்கப் பட்டன. இது ஒரு பெரிய சாதனை. உலகச் சாதனை என்றுகூட சொல்லலாம்.

இதுதான் மனிதன் உருவாக்கிய உலகின் முதல் வனவிலங்குகள் கடக்கும் பாதை ஆகும். பாதை என்றால் ஒற்றையடிப் பாதை என்று நினைத்துவிட வேண்டாம். அந்தப் பாதையின் அகலம் நான்கு கிலோ மீட்டார்கள். அவ்வளவு அகலம்.
 
அந்த நான்கு கி.மீ. பாதைக்கு அடியில் நெடுஞ்சாலைச் சுரங்கம் அமைக்கப் பட்டு உள்ளது. அந்தச் சுரங்கப் பாதைகள் வழியாகத் தான் வாகனங்கள் செல்கின்றன. மேலே வனவிலங்குகள் இடம் பெயர்கின்றன.

வனவிலங்குகள் கடக்கும் பாதையில் புற்களை மட்டும் நட்டு வைத்து இருக்கிறார்கள். மரங்களைத் தவிர்த்து விட்டார்கள்.

பாதையின் இருபுறமும் வேலிகள் அமைத்து இருக்கிறார்கள். வன விலங்குகள் தடம் மாறி நெடுஞ்சாலைக்குள் வந்து விடாமல் இருப்பதற்காக அந்த வேலிகள்.

இந்தப் பாதை நான்கு கி.மீ. அகலமாக இருப்பதால் விலங்குகள் கடந்து செல்வதை வாகனமோட்டிகள் பார்க்க இயலாது.
 
வாயில்லா ஜீவன்களைப் பாதுகாக்க வேண்டியது மனிதர்களின் பொறுப்பு. அதுவே மனிதர்களின் விலங்கு நேயக் கடமை.

ஒரு செருகல். நம் மலேசிய நாட்டில் சில இடங்களில் காடுகளை அழித்து வருகிறார்கள். என்ன சொன்னாலும் கேட்பதாக இல்லை. ஈப்போ கிளேடாங் மலை அடிவாரம் அழிக்கப்பட்ட சம்பவத்தைச் சொல்லலாம்.

மலையின் அடிவாரத்தில் என் இல்லம் உள்ளது. அழகிய பச்சை மலை. நீல வானம். சூரியன் மறையும் போது இன்னும் பத்து வருசம் கூடுதலாக வாழ வேண்டும் என்கிற ஆசை வரும் அளவிற்கு இயற்கைச் சூழல். அப்பேர்ப்பட்ட இடம். 

அங்கே இருந்து பார்த்தால், அந்தக் காட்டு அழிப்பு தெரியவே தெரியாது. அவ்வளவு பக்காவாக செய்து இருக்கிறார்கள்.

விசயம் தெரிந்து ஆளாளுக்குக் கண்டனம் தெரிவிக்க... நிறுத்தி விட்டார்கள். விடுவோமா நாங்கள்.

காட்டில் பேய் இருப்பதாகச் சொல்வார்கள். அது எல்லாம் கிடையாதுங்க. அக்கம் பக்கத்தில் தான் மனிதப் பேய்களும் மனிதப் பிசாசுகளும் இருக்கின்றன. அதனால் தான் சிலரைப் பார்த்ததும் நாய்கள் ஊளையிடுகின்றன. ஆராய்ச்சி பண்ணிப் பார்க்க வேண்டும். சரி.

மலேசியாவில் காடுகள் ஆங்காங்கே அழிக்கப் படுகின்றன. அதற்கு மூலக் காரணம் யார் தெரியுங்களா. சில அரசியல்வாதிகள் தான். எல்லோரும் அல்ல.
 
முன்பு அரசியல்வாதிகள் மக்களுக்காக வாழ்ந்தார்கள்; தெய்வத்திற்கு நிகராய்ப் போற்றப் பட்டார்கள். இப்போது மிகவும் குறைவு. இருக்கிறார்களா என்றுகூட தெரியவில்லை. எதற்கும் அனைத்துலக 007 ஜெம்ஸ் பாண்டுகளைக் கூப்பிட்டு தேடச் சொல்ல வேண்டி உள்ளது.

இப்போதைய அரசியல்வாதிகளில் சிலர் பாவம்... அரசியல் வியாதிகளால் ரொம்பவுமே அவதிப் படுகிறார்கள். அப்படிப் பட்டவர்களுக்கு அரசியல் வியாதி அம்புலன்ஸ்கள் தேவை படுகின்றன. ஆர்டர் கொடுக்க வேண்டும்.

அதே சமயத்தில் அந்த ஆர்டரை அடுத்த பொருளாதாரத் திட்டத்தில் சேர்க்காமல் இருந்தால் சரி. ஏன் என்றால் அதிலும் ஆட்டை போடும் வாய்ப்புகள் நிறையவே உள்ளன.

(மலாக்கா முத்துக்கிருஷ்ணன்)
29.09.2019

பேஸ்புக் அன்பர்களின் பின்னூட்டங்கள்
Sathya Raman சிறப்பான ஆய்வு கட்டுரை சார். காடுகளைப் பற்றியும் அதன் மகத்துவத்துவத்தைப் பற்றியும் கொஞ்மேனும் கவலைப் படாமல் அவற்றை அழித்து வரும் இந்த உலக மகா அரசியல்வாதிகளையும் அவர்களுக்குள் இருக்கும் பேராசையையும் நீங்களோ, நானோ தடுத்து விட முடியாது சார்.

ரொம்ப வேண்டாம். இன்று கேமரன் மலைக்குச் சென்று வருபவர்கள் முன்பு போல் அங்கே குளிர்ச்சி இல்லை என்கிற குற்றசாட்டுகளையே முன் வைக்கிறார்கள் என்றால் அங்கே அழிந்து வரும் காடுகளால் தான். நான் அங்கே வளர்ந்து படித்தவள்.

என் பள்ளி நாட்களில் ஒரு தடவைகூட  குளிர்ச் சட்டையை அணியாமல் சென்றது இல்லை... இருந்ததும் இல்லை. வருட இறுதியில் உதிரத்தை உறைய வைக்கும் குளிராக இருந்த அந்த மலைப் பிரதேசத்தில் இன்று மழைக் காலங்களில் கூட உடல் சூடாவதை உணர்கிறோம்.

நமக்கு கிடைத்த அரிய, பெரிய பொக்கிஷங்களை இன்று பணத்திற்காகத் தனி மனிதப் பெரு வாழ்வுக்காக இழந்து வரும் அவலம். காடுகளை அழிப்பதால் காட்டு மிருகங்கள் மனிதர்களின் குடியிருப்புகளைத் தேடி வராமல் என்ன செய்யும்?

வீட்டைக் குளிர்விக்க, குளிர்ச்சாதனப் பெட்டி வாங்குகிறோம். ஆனால் பூமியைக் குளிர்விக்க மரக் கன்றுகளை நடுவதில்லை. மாறாக அழித்து வருகிறார்கள். கோபமும், புயலும் ஓரே மாதிரி தான். அடங்கிய பின் தெரியும். எவ்வளவு இழப்புக்களை ஏற்படுத்தியது என்று.

அதேப் போல் தான் இந்த அரசியவாதிகளின் செய்கைகளால் நம் நாடும் பல இயற்கையின் எழில்களை இழப்புகளாய் எதிர்நோக்கி கொண்டு இருக்கிறது என்பதே நிதர்சனமான உண்மை.