தமிழ் மலர் - 25.11.2020
அதிகரித்து வரும் செலவுகள் காரணமாக, சிங்கப்பூரில் பணிபுரியும் சில மலேசியர்கள் வீடு அற்றவர்களாக வாழ வேண்டிய கட்டாயத்தில் உள்ளனர் என்ற பத்திரிகை செய்தியைத் தொடர்ந்து, கிள்ளான் எம்.பி. சார்ல்ஸ் சாந்தியாகோ அரசாங்கத்தை விமர்சித்து உள்ளார்.
சிங்கப்பூரில் உள்ள தனது பொருளாதார அகதிகளை மலேசியா கவனித்துக் கொள்ள வேண்டும்.
தூதரகங்களுக்கு அனுப்பப்படும் கடிதங்களுக்கும் தொலைபேசி அழைப்புகளுக்கும் எந்த ஒரு பதிலும் கிடைப்பது இல்லை என்று கேள்விப் பட்டேன் என்றார் அவர்.
இந்த விவகாரத்தில் தலையிட்டு, உடனடி நடவடிக்கை எடுக்க வெளியுறவு அமைச்சர் டத்தோஸ்ரீ ஹிஷாமுடின் உசேனுக்கு அறிவுறுத்த வேண்டும் என்று பிரதமர் முஹிடின் யாசினை சார்ல்ஸ் கேட்டுக் கொண்டார்.
சிங்கப்பூரில் பணிபுரியும், ஏறக்குறைய 100 மலேசியர்கள், ஓர் அறையை அல்லது படுக்கையை வாடகைக்கு எடுக்க முடியாமல், வீடு அற்றவர்களாக இருக்கின்றனர் என்று நேற்று நியூ ஸ்ட்ரெய்ட்ஸ் டைம்ஸ் வெளியிட்ட அறிக்கைக்கு சார்ல்ஸ் பதில் அளித்தார்.
சராசரி மாத வருமானம் 800 சிங்கப்பூர் டாலரில் இருந்து (2,441 மலேசிய வெள்ளி) 1,400 சிங்கப்பூர் டாலர் (4,271 மலேசிய வெள்ளி) வரையில் எனும் போது, மாதத்திற்கு 300 - 500 சிங்கப்பூர் டாலரில் ஒரு படுக்கை; அல்லது 700 - 1,200 சிங்கப்பூர் டாலரில் ஓர் அறையை வாடகைக்கு எடுப்பது பலரால் முடியாது என்று சிங்கப்பூரில் பணிபுரியும் ஷாருதீன் ஹேல் ஹெல்மி மொஹமட் நோ கூறினார்.
மலேசியர்கள் தங்கள் வாழ்வாதாரத்தைத் தக்க வைத்துக் கொள்ள வேண்டியதன் காரணமாக சிங்கப்பூரில் சிக்கி உள்ளதாகவும், மலேசியாவுக்குத் திரும்புவதற்கான பயண ஏற்பாடு வசதிகள் (பி.சி.ஏ.) இருந்த போதிலும், சிங்கப்பூரில் தங்கும் படியான கட்டாய விதிமுறைகளை சில முதலாளிகள் வகுத்து உள்ளதாகத் தெரிகிறது.
குறுகிய விடுப்பு எடுக்க மட்டுமே அனுமதிக்கப்பட்டு இருக்கும் நிலையில், மலேசியாவுக்குத் திரும்பும் போது 14 நாள் கட்டாயத் தனிமைப் படுத்தல் மற்றும் சிங்கப்பூருக்குத் திரும்பும் போது மற்றொரு சுற்று தனிமைப் படுத்தல் ஆகியவற்றால் அவர்களின் வேலை வாய்ப்பு பாதிக்கும் என்ற பயத்தால் பலர் பல மாதங்களாக வீடு திரும்பாமல் இருக்கின்றனர்.
இப்படிப்பட்ட சூழ்நிலைகள் காரணமாக, சில மலேசியர்கள் சாலை ஓரத்திலோ பொது பெஞ்சுகளிலோ தூங்கி, பொதுக் கழிப்பறைகளில் குளிப்பதோடு, அன்றாட உணவுக்குக்கூட பெரும்பாலோர் தவித்து வருகின்றனர்.
ஆகவே இதற்கு மலேசிய அரசாங்கம் உடனடியாகத் தீர்வு காண வேண்டும் என்று சார்ல்ஸ் கேட்டுக் கொண்டார்.
கருத்துகள் இல்லை:
கருத்துரையிடுக