(மலேசிய நண்பன் ஞாயிறு நாளிதழில் வெளியான கணினியும் நீங்களும் கேள்வி பதில் பகுதியைக் கட்டம் கட்டமாக இந்த வலைப் பூவில் பிரசுரித்து வருகிறேன். பழைய எல்லாப் பகுதிகளும் வெளி வந்த பின்னர், ஞாயிற்றுக் கிழமைகளில் பிரசுக்கப் படும் அதே பகுதி அதே தினத்தில் இந்த வலைப் பதிவிலும் பிரசுரிக்கப் படும். உலகில் உள்ள அனைத்துத் தமிழர்களும் படிக்க வேண்டும். பயன் அடைய வேண்டும். நீங்கள் மின்னஞ்சல் வழியாகக் கேள்விகள் கேட்கலாம். உங்கள் கேள்விகள் நாளிதழிலும் வெளிவரும். இணையத்திலும் வரும். (மலேசிய நண்பன் - 04.01.2010 ஞாயிறு நாளிதழில் வெளியானது)
குமாரி.ஷர்மிளா, குவாந்தான்
(குறும் செய்தி 8.12.2009)
கே: சார், நான் ஒரு பள்ளி மாணவி. எனக்கு ஒரு பெரிய பிரச்னை. Bit Defender 9 Internet Security பயன் படுத்தினேன். அது காலாவதி ஆகிவிட்டது. அதனால் என்னுடைய மடிக்கணினி அடிக்கடி தானாக சொந்தமாக நிறுத்திக் கொள்கிறது. வேலை எதுவும் செய்ய முடியவில்லை. உதவி செய்யுங்கள்?
ப: இந்தக் கேள்வி கிடைத்து ஒரு மாதத்திற்கும் மேல் ஆகிறது. உடனடி பதில் வேண்டும் என்றால் மின்னஞ்சல் வழி கேளுங்கள். Bit Defender 9 Internet Security என்பது ஓர் இணையப் பாது காப்பு நிரலி. இது ஒரு Shareware எனும் 'பகிர்வு மென்பொருள்'. அவர்கள் கொடுக்கும் போது Trial Version எனும் 'வெள்ளோட்டப் பதிப்பு' முறையில் கொடுப்பார்கள்.
ஒரு குறிப்பிட்ட காலத்திற்குப் பின்னர் நீங்கள் அதை வாங்க வேண்டும். இல்லை என்றால் அந்தப் பதிப்புகள் பல பிரச்னைகளைக் கொடுக்கும். சோழியன் குடுமி சும்மா ஆடாது என்பார்கள். அந்த மாதிரி அதைக் கணினியில் இருந்து அகற்றுவதும் சிரமம். முதலில் நீங்கள் செய்ய வேண்டியது இதுதான்.
http://www.bitdefender.com/files/KnowledgeBase/file/BitDefender_Uninstall_Tool.EXE எனும்
இணையத் தளத்தில் Bit Defender Uninstall Tool எனும் நிரலியைப் பதிவு இறக்கம் செய்து கொள்ளுங்கள். அதைப் பயன் படுத்தி Bit Defender இணையப் பாதுகாப்பு நிரலியைக் கணினியிலிருந்து முதலில் சுத்தமாக அகற்றி விடுங்கள். இல்லை என்றால் அதன் அசடுகள் கணினிக்குள் மறைந்து கிடக்கும். காலப் போக்கில் பல பிரச்னைகளைக் கொடுக்கும். சரியா.
அதன் பிறகு AVG Anti-Virus Free Edition 9.0.730 எனும் நச்சுத் தடுப்பு நிரலியை உங்கள் கணினிக்குள் பதித்துக் கொள்ளுங்கள். இது www.avg.com எனும் முகவரியில் இலவசமாகக் கிடைக்கிறது. எந்த ஒரு நிரலியாக இருந்தாலும் சரி, அதில் இலகுவான uninstall எனும் 'பதிப்பு அகற்றல்' வசதிகள், user-friendly எனும் 'இணக்கப் போக்கு'த் தன்மைகள் இருக்க வேண்டும். இல்லை என்றால் பயனீட்டாளர்களுக்குத் தான் சிரமம்.
எம்.அன்பரசன், ஈப்போ
(குறும் செய்தி 18.11.2009)
கே: சார், நான் ஒரு நோக்கியா கைப்பேசியை நண்பரிடம் இருந்து RM850க்கு வாங்கினேன். அந்தக் கைப்பேசி நவம்பர் 2009ல் வெளி வந்ததாக நண்பர் சொன்னார். கடைக்காரரிடம் கேட்டுப் பார்த்ததில் அக்டோபர் 2009ல் வெளி வந்தது என்று கடைக்காரர் சொல்கிறார். என் நண்பர் என்னை ஏமாற்றி விட்டதாக நினைக்கிறேன்? இரண்டாம் தாரமாக வாங்கியது தப்பாகி விட்டது.
ப: தரம் என்பது தாரமாகி விட்டது. பரவாயில்லை. விலைவாசி மலைவாசியாக மாறிவிட்ட காலம். உங்கள் நண்பரை நம்பித் தானே கொடுக்கல் வாங்கலில் இறங்கினீர்கள். ஒன்பதாவது மாதத்திற்கும் பத்தாவது மாதத்திற்கும் முப்பது நாள்தானே வித்தியாசம். அப்படி என்ன இதில் தலை போகிற விஷயம் இருக்கிறது.
விட்டுக் கொடுத்துப் போங்கள். யாரிடமிருந்து எந்த ஒரு பொருளை வாங்கினாலும் அது எப்போது தயாரிக்கப் பட்டது, என்ன விலை போன்ற விவரங்களை முதலில் தெரிந்து கொள்ள வேண்டும். இல்லை என்றால் மின்னல் மின்னும். இடி இடிக்கும்.
நோக்கியா கைப்பேசிகள் தயாரிக்கப் பட்ட திகதியைக் கண்டுபிடிக்க ஒரு வழி இருக்கிறது. *#92702689# என்று தட்டுங்கள். அந்தக் கைப்பேசி எப்போது தயாரிக்கப் பட்டது, எப்போது வாங்கப் பட்டது போன்ற விவரங்கள் இருக்கும். பின்னர் கைப்பேசியை முழுமையாக அடைத்து விட்டு வெளியேறுங்கள். தவறுகள் இருக்கலாம். அமைதியாக, சமாதானமாகப் பேசுங்கள். சச்சரவுகள் வேண்டாம். சண்டை போட்டதாகக் கேள்வி பட்டால்...
ரகுநாதன், பெட்டாலிங் ஜெயா
(குறும் செய்தி 21.11.2009)
கே: தமிழில் Key Board மென்பொருள் கோலாலம்பூரில் எங்கே கிடைக்கும்?
ப: இப்போது தமிழில் தட்டச்சு வெளி வருவது மிகவும் குறைவு. ஏனென்றால், இப்போது வரும் கணினிகள் மிகவும் நவீனமாகி விட்டன. அதனால் Phonetics எனும் 'ஒலியியல் முறை'யைப் பயன் படுத்தித் தமிழில் தட்டச்சு செய்யலாம்.
அஞ்சல் முரசை எப்படி பயன் படுத்துகிறீர்களோ அதே மாதிரி. தனியாகத் தமிழ்த் தட்டச்சுப் பலகையை வாங்க வேண்டிய அவசியம் இல்லை. இப்போது வருபவை எல்லாம் Phonetic Key Boards எனும் 'ஒலியியல் விசைப் பலகைகள்' ஆகும்.
இருந்தாலும் http://www.brothersoft.com/tamil-keyboard-54576.html எனும் இடத்தில் தமிழ் தட்டச்சுப் பலகையை இலவசமாகக் கொடுக்கிறார்கள். போய் பதிவு இறக்கம் செய்து கொள்ளுங்கள். இது ஒரு On Screen Keyboard. அப்படி என்றால் தட்டச்சுப் பலகை கணினியில் தெரியும் என்று அர்த்தம். தமிழில் 'திரை விசைப் பலகை' என்று சொல்லலாம்.
இதே போல ஓர் ஆங்கிலத் தட்டச்சுப் பலகை உங்கள் கணினியிலும் உள்ளது. Start >> Run >> osk என்று தட்டுங்கள். அந்தத் தட்டச்சுப் பலகை முகப்புத் திரையில் வந்து உட்கார்ந்து கொள்ளும். மேலே காணும் தமிழ்க் கணினிச் சொற்களை அடியேன் உருவாக்கினேன். செரிவுகளும் சரிவுகளும் இருக்கலாம். சரி செய்வது உங்கள் கடமை.
சுகுமாறன் sugu_1305@yahoo.com
கே: என்னுடைய மின்னஞ்சல் முகவரிக்கான Password ஐ மறந்து விட்டேன். எப்படி மீட்பது? உதவி செய்யுங்கள் ஐயா.
ப: Password எனும் ஏழு எட்டு எழுத்துகளைக் கொண்ட 'கடவுச் சொல்'லை மறந்து விடும் அளவிற்கு அப்படி என்ன பெரிய வேலை. இந்தக் காலத்தில் எதற்கு எடுத்தாலும் மறதி மறதி என்று சொல்லி... ரொம்ப பேர் மனைவி மக்களைகூட மறந்து விட்டு அலைகிறார்கள்.
அந்த மாதிரியான மறதி யாருக்கும் வரக் கூடாது. இனிமேல் கவனமாக எழுதி வைத்துக் கொள்ளுங்கள். சரியா. http://www.snapfiles.com/get/mpw.html எனும் இடத்தில் Mail Password Recovery எனும் நிரலி இருக்கிறது. அதைப் பயன் படுத்தி உங்களுடைய சங்கேதச் சொல்லை மீட்டுக் கொள்ளுங்கள். தவிர
http://www.download3k.com/Internet/Email/Download-Email-Password-Recovery-pop3.html
எனும் இடத்திலும் ஒரு நிரலியும் இலவசமாகக் கிடைக்கிறது. அதற்காக இதைப் பயன் படுத்தி அடுத்தவருடைய மின்னஞ்சல்களைப் படிக்க வேண்டாம். அடுத்தவர் மின்னஞ்சல் கடிதங்களைப் படிப்பது இருக்கிறதே அது ரொம்பவும் தப்பு.
தர்ஷ்னி பாலகோபாலன், ஜெராண்டுட், பகாங்
கே: Spyware என்றால் என்ன? எப்படி கட்டுப்படுத்துவது?
ப: Spyware என்பது ஒற்றன் மென்பொருள். இதுவும் ஒரு சின்ன நிரலிதான். உங்களின் அனுமதி இல்லாமல் உங்களின் கணினிக்குள் உட்கார்ந்து கொண்டு உங்களைக் கண்காணிக்கும் ஓர் ஒற்றன் நிரலி. நீங்கள் எந்த வலைத் தளங்களுக்குப் போகிறீர்கள், அங்கே என்ன செய்கிறீர்கள் எனும் ரகசியங்களைச் சத்தம் இல்லாமல் தன் எஜமானனுக்கு அனுப்பி வைக்கும்.
இதன் செயல் இருக்கிறதே அது மறைந்து ஒளிந்து மற்றவர் அழகைப் படிப்பதற்குச் சமம். தேவைதானா? ஆக,கண்ட கண்ட இணையத் தளங்களுக்குப் போய் கண்டதை எல்லாம் பதிவிறக்கம் செய்ய வேண்டாம்.
வாணி கோகிலா , Johor Bahru
கே: சார் Opera எனும் உலவி இருக்கிறதாமே. அதைப் பற்றி உங்கள் கருத்து என்ன?
ப: நல்ல கேள்வி. இணையத்தில் உள்ள தளங்களைப் படிக்க ஒரு Browser தேவை. இந்த Browser என்பதும் ஒரு நிரலிதான். தமிழில் உலவி என்கிறோம். Internet Explorer எனும் இணைய நிரலியை மைக்ராசாப்ட் நிறுவனம் விற்பனை செய்கிறது. பணம் கொடுத்து விண்டோஸ் வாங்கினால் 'இண்டர்னட் எக்ஸ்புளரர்' கிடைக்கும். அதற்குப் பதிலாக வந்தது 'பயர் பாக்ஸ்'. Fire Fox என்பது இலவச நிரலி. மிக மிக அருமையானது.
உலத்தில் உள்ள தலை சிறந்த கணினி வித்துவான்கள் அனைவரும் சேர்ந்து உருவாக்கியது. இதனிடம் 'இண்டர்னட் எக்ஸ்புளரர்' சற்று தள்ளியே நிற்க வேண்டும். அதே போல உருவானது தான் Opera எனும் உலவி. இதற்கும் நிறைய சிறப்புகள் உள்ளன. கொஞ்ச நாளில் 'இண்டர்னட் எக்ஸ்புளரர்' ஐ தள்ளிவிட்டு இரண்டாவது இடத்திற்கு வந்தாலும் வரலாம். www.opera.org எனும் இடத்தில் இலவசமாகக் கிடைக்கிறது.